Wednesday, November 6, 2013

ខឹងច្រើនឆាប់ចាស់

បីថ្ងៃ មកហើយ អូនប្រងើយ នឹងបង
មិនដឹង នួនល្អង មានបំណង យ៉ាងណា
សួរអ្វី មិនឆ្លើយ កន្តើយនឹង រៀមរ៉ា
បងដឹង ច្បាស់ថា ជីវា ប្រច័ណ្ឌបង

ខឹងដូចច្នោះ ខុសហើយមុំ
ខឹងធ្វើអ្វី យូរៗ សុំច្បាប់ ដើរម្ដង
ឈប់ខឹងទៅ ពៅនួនល្អង
លើកក្រោយ រៀមបង ឈប់ដើរ ហើយពៅ

ពេលគេង ជិតបង អូនបែខ្នង ជានិច្ច
កេះកៀវ បន្តិច ងាកមក ក្ដិចក្រចៅ
ទាញភួយ ដណ្ដប់ គ្របទាំង ស្អុះទាំងក្ដៅ
តើថ្ងៃ ណាទៅ ទើបស្រីពៅ ឈប់ខឹង

ខឹងច្រើនពេក តិចឆាប់ចាស់
តែខឹងច្រើន អាយុខ្លីណាស់ ព្រលឹង
ល្មមឈប់ ងរ ល្មមឈប់ ខឹង
ងរង៉ក់ បីថ្ងៃ ប៉ុណ្ណឹង បានហើយ